Индонез улсын хөгжлийн бэрхшээлтэй оюутныг дэмжих төслийн томилолтын тайлан

Индонез улс дахь томилолтын 2 дахь өдөр бид 8 дугаар сарын сүүлчээр зохион байгуулахаар төлөвлөгдөж буй Япон дахь сургалтад хамрагдах оролцогчдод зориулсан урьдчилсан сургалтыг "Pijar" сан дээр зохион байгууллаа. Бид техникийн хамтын ажиллагааны төслийг хэрэгжүүлэхдээ Япон дахь сургалтыг чухалчилдаг бөгөөд урьдчилсан сургалтыг мөн адил өндөр ач холбогдолтойд тооцдог. Энэхүү хоёр сургалт нь хоорондоо салшгүй холбоотой бөгөөд Япон дахь сургалтын дараа орон хэрэгжүүлэх үйл ажиллагааны төлөвлөгөө нь төслийн гурав дахь чухал бүрэлдэхүүн хэсэг юм.

Эхний өдөр бид Индонезийн чиглүүлэгч багш нараар DET (Хөгжлийн бэрхшээл ба тэгш байдлын тухай сургалт)-ийг удирдуулсан бөгөөд тулгуур эрхтний, сонсголын болон харааны бэрхшээлтэй иргэдтэй хэрхэн харилцах, тусламж үзүүлэх талаарх дадлагад суурилсан сургалтыг зохион байгууллаа. Япон дахь сургалтад хамрагдах Индонезийн дараах 5 их сургуулийн төлөөлөл оролцов:

UIN Ar-Raniry Banda Aceh 2.
Universitas Bina Mandiri Gorontalo

UNIVERSITAS PGRI ARGOPURO JEMBER
Institut Teknologi dan Bisnis Kalla
Institut Teknologi Sepuluh Nopember

Их сургууль тус бүрээс 2 төлөөлөл оролцсон тул сургалтад нийт 10 хүн хамрагдлаа. DET болон хөгжлийн бэрхшээлтэй иргэдтэй хэрхэн харилцах, тусламж үзүүлэх талаарх дадлагад суурилсан сургалтын дараа төслийн Япон талын баг өөрсдийгөө танилцуулж, сургууль тус бүр өөрсдийн танилцуулгыг хийлээ.Сургууль тус бүрийн онцлогийг товч дурдвал:

Нэн түрүүнд Суматра арлын хамгийн хойд цэг болох Аче мужийн Банда-Аче хотод байрлах UIN Ar-Raniry их сургууль. Тус сургуульд хөгжлийн бэрхшээлтэй 13-17 орчим оюутан суралцдаг. Сүүлийн үед хөгжлийн бэрхшээлтэй оюутныг дэмжих төвийг байгуулсан бөгөөд одоогоор сонсголын бэрхшээлтэй оюутнуудыг дэмжих төлөвлөгөөг боловсруулж байна. Хөгжлийн бэрхшээлийн талаарх хүмүүсийн урьдчилсан ташаа хандлага, хэвшмэл ойлголт хамгийн том бэрхшээл болж буйг онцолсон маш идэвх зүтгэлтэй 2 багш оролцсон.

Түүний дараа Индонезийн зүүн хэсэгт орших Сулавеси арлын Bina Mandiri их сургууль. 2024 онд хөгжлийн бэрхшээлтэй оюутныг дэмжих төвийг байгуулсан бөгөөд одоогоор хөгжлийн бэрхшээлтэй 14 оюутан суралцаж байна. Япон хэлтэй Аюу багш болон Дэмжих төвийн эрхлэгч сургалтад оролцсон юм. Үйл ажиллагаа нь дөнгөж эхэлж байгаа ч сургуулийн зүгээс тэгш хамруулах сургалтын орчныг бүрдүүлэх эрмэлзэлтэй байгаа бөгөөд Сулавеси арлын хойд хэсгийн төв бөгөөд бүс нутагтаа хөгжлийн бэрхшээлтэй оюутан хүлээн авдаг цор ганц их сургууль гэдэг нь анхаарал татаж байлаа.

Зүүн Ява мужийн PGRI ARGOPURO JEMBER их сургууль нь хөгжлийн бэрхшээлтэй 189 оюутантай бөгөөд энэ удаагийн 5 сургууль дотроо төдийгүй Индонез улс дотроо хамгийн олон хөгжлийн бэрхшээлтэй оюутан хүлээн авсан сургууль юм. Энэхүү оюутнуудын ихэнх нь тэтгэлгээр суралцдаг бөгөөд сургуулийн зүгээс Оюутныг дэмжих төвийг байгуулан ажиллуулж байна. Гэсэн хэдий ч стандарт журам, удирдамж зэрэг нь дутагдалтай, үйлчилгээ нь системчлэгдээгүй байгаа тул суралцагчдын сурлагын тал дээрх асуудлыг хэрхэн шийдвэрлэх талаар Японоос суралцах хүсэлтэй байгаагаа илэрхийлсэн. Мөн сургалтад хөгжлийн бэрхшээлтэй багш оролцсон нь бидэнд маш таатай байлаа.

Өмнөд Сулавеси мужийн Макассар хотод байрлах Kalla Технологийн сургууль нь 2019 онд байгуулагдсан шинэ сургууль бөгөөд хөгжлийн бэрхшээлтэй оюутнуудыг дэмжих ажлыг сүүлийн үед эхлүүлсэн. Одоогоор 17 хөгжлийн бэрхшээлтэй оюутантай, туршлага дутмаг байгаа тул энэхүү төслөөс олон зүйл сурч мэдэхийг зорин, тус төвийг зөвхөн хөгжлийн бэрхшээлтэй оюутныг дэмжих бус, сургуулийн бүх оюутныг дэмжих төв болгох томоохон төлөвлөгөөтэй байгаагаа хуваалцлаа.

Эцэст нь, Sepuluh Nopember Технологийн сургууль нь Зүүн Ява мужийн Сурабая хотод байрлах 30,000 орчим оюутантай улсын томоохон сургууль бөгөөд улсдаа тэргүүлэх зэрэглэлийн сургуулиудын нэг юм. Тус сургуульд хөгжлийн бэрхшээлтэй 23 оюутан суралцдаг ба 2025 онд Захирлын тушаалаар “Хөгжлийн бэрхшээлтэй оюутныг дэмжих төв”-ийг байгуулжээ. Шинээр байгуулагдсан тул дэмжлэг үзүүлэх арга барил дутмаг байгаа бөгөөд энэхүү төслөөс туршлага судлах эрмэлзэл өндөр байна. Бид энэ удаагийн томилолтоороо тус сургуульд зочлохоор төлөвлөж байгаа тул нөхцөл байдалтай биечлэн танилцах төлөвлөгөөтэй байна.